25 Payares: Darréu nel Día Contra la Violencia de Xéneru.

Fuente: Nota de prensa de Darréu.
La organización xuvenil d'Izquierda Soberanista - Darréu- quier espresar la so posición sobro la violencia xéneru nesti 25 de payares, conscientes de que la violencia sexista tien de ser combatía tolos díes del añu col mesmu enfotu. Darréu critica l'enfoque hipócrita y cuasi que caritativu que-y dan a esti día les alministraciones públiques, que denuncien los casos de violencia pero tan avezaes a nun afondar nes causes que faen que'l terrorismu de xéneru seya una realidá tan viva anguaño.

Pa Darréu la violencia de xéneru nun ye nenguna casualidá, nin ye una cuestión qu'únicamente podramos desplicar como una catástrofe de les persones. La violencia de xéneru tien de ser superada y pa eso camentamos que ye necesariu nun dir tanto a les consecuencies, sinon más a les causes y les responsbilidaes, dalgo que munches vegaes s'escaez, consciente o inconscientemente, nes instituciones públiques.
Los políticos asturianos y tamién de munchos otros llugares, asina como les instituciones públiques, nun faen otra cosa que mirar pa otru llau y emplegar esti día como un ritual que recuerda muncho a eses iniciatives que quieren acabar cola probitú namái que con caridá, por poner un exemplu. Lo ciertu ye que'l Patriarcáu esiste, por muncho que quieran ñegalo dende la oligarquía española. Un Patriarcáu que día tres día agrede a la muyer con estremaes espresiones de violencia.
Los mesmos y les mesmes que güei s'enllenen la boca de bones pallabres son cómplices o participantes activos d'esi patriarcáu qu'oprime a la muyer. Dende la mocedá asturiano soberanista y revolucionario llamamos a les muyeres d'Asturies a apostar pola autodefensa feminista como rempuesta a esi terrorismu patriarcal que vivimos día a dia. Nun podemos inorar que l'únicu camín pa superar esti escenariu ye la tresformación de la sociedá, superando'l capitalismu, un sistema afitáu na desigualdá de xéneru y de clas. Col capitalismu siempres vamos tener Patriarcáu y violencia de xéneru, poro dende Darréu llamamos a la mocedá asturiano a combatir esti sistema patriarcal col envís de contruyir una sociedá nueva onde la muyer tea igual dignidá, drechos y consideración que l'home.
CONTRA'L PATRIARCÁU Y LA SO VIOLENCIA ¡AUTODEFENSA FEMINISTA!
Publicar un comentario

Archivos del Blog