Por una esquierda asturianista

Pa les persones que militamos nel nacionalismu asturianu, a menos d'un añu de les eleiciones de 2007, resulta un llabor perentoriu analizar porqué nenguna fuerza asturianista tien anguaño representación parllamentaria y estraer del análisis les conclusiones que nos permitan corrixir una situación que podemos calificar d'anormal. N'Asturies hebo históricamente una bolsa de votu asturianista abondo pa llograr representación, al igual qu'un caldu de cultivu social y cultural que simpatiza col discursu asturianista, pero que nun tien anguaño una articulación política más allá de lo meramente testimonial.

Amerita recordar que l'asturianismu foi p'algamar representación parllamentaria per primer vegada cuando acudió a les urnes en 1991 na Coalición Asturiana que formaben el PAS y la UNA y qu'obtuvieren un númberu de votos abondo p'algamar el diputáu. ¿Qué mena de votantes dieren el so apoyu a aquella opción qu'irrumpió con fuerza nel panorama políticu d'a primeros de los 90? Toles encuestes feches nesi sen mostraren que'l votu asturianista ye mayoritariamente d'esquierdes y que los votantes de la Coalición Asturiana taben nun perfil ideolóxicu ubicáu ente PSOE y IU. Ye evidente que de nenguna manera el tener una sensibilidá asturianista o nacionalista implica necesariamente ser d'esquierdes, pero sí ye un fechu refrendáu poles encuestes sociolóxiques que la mayoría de les persones que n'Asturies tán dispuestes a comprometer el so votu apostando por una opción nacionalista tán na esquierda del espectru ideolóxicu.

Nesi contestu somos a entender como ún de los principales errores del PAS, qu'heredó la representación de Coalición Asturiana en posteriores eleiciones, foi -amás de prescindir de forma infame del so sociu de coalición gracies al cual llegare al parllamentu- volver el llombu al so electoráu convirtiéndose a un discursu populista y conservador que lo llevaren a ser un apéndiz asturianizáu del PP, tanto en discursu como n'actuación. Esta deriva derechista impidió-y caltener la base votante y militante, trayendo como consecuencia lóxica que, énte'l primer vaivién electoral, el so presidente fore desapolináu de la Xunta Xeneral. L'intentu d'enantar caladeros na derecha per parte del PAS dexó'l flancu esquierdu albentestate pa que l'oportunismu d'IU trabayare a sos deleres y pudiere desenvolver una táctica d'impostura asturianista, postulándose como l'alternativa asturianista y d'esquierdes al populismu derechista de Xuan Xosé Sánchez Vicente, qu'atopó'l so caldu de cultivu en sectores del asturianismu que yá nun se podíen ver representaos pol PAS.

Per otru llau, otra de les característiques del votante asturianista ye'l so dinamismu. El votante dispuestu a enfotase nuna opción nacionalista asturiana sabe que col so votu ta propiciando un cambéu de paradigma social na concepción de qué ye Asturies, a la llectura del nuesu pasáu y a les nueses espectatives y deseos pal futuru. El votante nacionalista cansó del estáu de coses actual y quier cambeos. Nun ye atrevío afirmar qu'hasta'l más moderáu de los votantes asturianistes ye menos conservador qu'un votante de PSOE o IU (nun digamos yá del PP) que, eleición tres eleición, apuesta por más de lo mesmo: una Asturies na que se desanicien les nueses señes d'identidá, y na que nun hai un proyectu autónomu de país.

Per otra parte nel panorama electoral asturianu, al igual que nel de tola Europa occidental, hai otra bolsa de votu que tamién propugna un cambéu radical de paradigma económicu y social que comparte col asturianismo l'amor a la tierra y que, d'una manera simplificada, suel llamase ecoloxista. Esti espaciu ta representáu por Los Verdes, una formación que caltién eleición tres eleición un númberu respetable de votos, pero siempre lloñe de la representación parllamentaria. El votante verde ye tamién una persona con sensibilidá d'esquierdes, farta de la política y los partíos tradicionales, que busca una alternativa a la política al usu y los valores utilitaristes y desarrollistes que ve reflexaos na esquierda oficial.

El nacionalismu d'esquierdes y l'alternativa verde comparten entós nel nuesu país un refileru de característiques que, nel casu de que foren a amestar, configuraríen un tercer espaciu allongáu de la esquierda tradicional nel gobiernu (PSOE y IU) y de la derecha del PP.

El cambéu de paradigma que proponen entrambes dos opciones representa un cambéu real respecto a la política tradicional darréu qu'ofrecen a la sociedá asturiana una visión nueva, integradora y ilusionante d'autoestima y d'amor al país, allongada del populismu y el desarrollismu.

Esti espaciu nun puede ser representáu por una coalicón PAS-URAS, que se presenta como una reedición entá más de dereches de les polítiques fracasaes del PAS y tampoco por una IU que yá nun puede pidir el votu asturianista en 2007 al perder la inmensa mayoría de los apoyos que tuviere nesti sector en 2003 pol fiascu que fore'l pautu de gobiernu del PSOE. El cúmulu de promeses incumpíes y sucesión de xestos a la galería estériles que se sucedieren a lo llargo d'esta lexislatura foren abondo pal votante asturianista d'esquierdes, que se decata de que si'l PAS dexó va muchu tiempu de ser una alternativa (y más agora que s'alió cola derecha escindida del PP) el viraxe asturianista d'IU nun foi otro qu'una táctica conxuntural destinada a captar una bolsa de güérfanos políticos.

Clave nesta estratexa foi'l triste papel representáu pol Bloque por Asturies, constituíu en coartada asturianista, a manera d'apéndiz d'IU y mirando pa otru llau na so política de pautu a prueba de bomba col PSOE. Tampoco l'espaciu verde puede vese representáu nunos socios de gobiernu que llevaren a Asturies a una situación inédita nel planu económicu y medioambiental qu'invalida a IU como una alternativa verde a pesar de que tamién en delles ocasiones gaste traxe ecoloxista p'arruñar un puñadín de votos despistaos.

Nesti momentu, a menos d'un añu de les eleiciones de 2007, resulta prioritario, sentar les bases que permitan ufiertar a la sociedá asturiana una alternativa electoral d'esquierdes, verde y asturianista que represente una respuesta con posibilidaes electorales a esa demanda d'un tercer espaciu representáu pol nacionalismu y l'alternativa verdes. Dende Izquierda Asturiana (IAS) tendiemos la mano a distintes fuerces polítiques y colectivos nacionalistes y verdes pa negociar una confluencia electoral qu'ofreza una alternativa seria y con posibilidaes pa les elecciones municipales y autonómiques de 2007. Ye posible y ye necesario. Nes nueses manes ta llogralo.

Ignaciu Llope Portavoz nacional d'Izquierda Asturiana
Artículo en: http://www.asturiasverde.com/2006octubre/00288opinion-ias.htm
Publicar un comentario

Archivos del Blog