Darréu pide oficialidá de la llingua Asturiana nel Día Internacional de la Llingua Materna

Fuente: Nota de prensa de Darréu, Mocedá d'Izquierda Soberanista.

Esti vienres 21 de febreru ye'l Día Internacional de la Llingua Materna y una vegada más n'Asturies hai un silenciu institucional respeutu a esti día pola falta de vergoña que xenera caltener una situación antidemocrática como la que vive la llingua d'Asturies nel so propiu dominiu. Un añu más la nuesa llingua materna sigue ensín tener un tratu dignu dende les instituciones públiques y ensín vese reconocía como idioma oficial dientru'l nuesu país, polo que los asturfalantes somos ciudadanos de segunda, con menos drechos.

Dende la Mocedá d'Izquierda Soberanista pidimos namái dos coses nel Día Internacional de la Llingua Materna: la declaración d'oficialidá de la llingua asturiana y un procesu de normalización llingüística n'Asturies claro y ensín prexuicios col envís de poder vivir plenamente n'asturianu y caltener la nuesa llingua. Estes son les nueses vindicaciones pa esti día, cumplir con unos mínimos democráticos qu'ainda güei ñeguen-y a esti pueblu y a esta llingua con sieglos y sieglos d'hestoria.
Creemos que la mocedá ye un motor de tresformación social y esta batalla tien de ganala la mocedá asturiano y naide más va ser pa con ello. Pa Darréu ye clave que la mocedá'l país esconsone y reclame con fuercia los sos drechos llingüísticos. Les nueves xeneraciones tenemos qu'algamar una Asturies más llibre, xusta y digna y pa qu'eso seya posible tenemos de superar el conflictu llingüísticu, paráu pol mal momentu que vive'l movimientu de vindicación llingüística y pola actitú antidemocrática y aculturizadora del sucursalismu n'Asturies.
Darréu recuerda tamién que tolos partíos políticos que tienen representación na Xunta Xeneral son cómplices de la situación que vive'l nuesu idioma, cuando non son actores direutos de la fobia escontra tolo que tien que ver cola nuesa llingua materna. Poro, llamamos a tol nuesu pueblu a pidir la oficialidá de forma organizada y constante ensín dexase llevar por promeses de posibilistes que namái acuden a la llingua como trampolín oportunista o eleutoralista.